KATO 列車模型之保養
這回想跟大家分享嘅係台車的保養。
通常一抽新買嘅車車輪都係立立令的，
行起上來好順冇乜問題，
室內燈裝妥後燈光都會非常穩定～
但隨著日積月累，
列車響唔同嘅場合穿州過省過後，
通常車輪都會積落唔少污垢，
有機會令車廂導電不良，
室內燈會無咁穩定；
如果摩打卡台車車輪有污垢，
抽車會窒下窒下，行車唔暢順...
今次會分享一下我自己點樣去幫自己嘅Kato車做保養。
是次用作示範嘅列車為Kato嘅東京メトロ銀座線 01系~
近來家中電視櫃放咗一個用Tomix C177同S280砌成的一個小Layout，
個圈直徑只有39cm，
呢抽車用來行走呢個圈就最好不過 :)
行走約一星期後車輪明顯累積咗唔少污垢... （如圖）
一來即係條路軌係時候要清洗一下，
二來車輪亦都需要適當嘅保養～
首先，清洗普通台車非常簡單，
只要準備一支棉花棒同一支Kato洗軌水 （24-020）便可。
有時有D二手車如果污垢太頑強的話，
可以直接將洗軌水滴落車輪上，
待一會再用棉花棒捽走污垢。
然後就輪到動力台車了。
除咗棉花棒同洗軌水外，
仲需要一個模型夾，一支Kato嘅金屬保護液 （24-021），
一支牙刷同埋少量嘅紙巾。
首先將摩打嘅底蓋拆開，
將台車取出時，要份外小心傳動軸，
（不慎丟了就糟糕啦～～～）
用模型夾尖對準個鉸位（如圖），
用少少力度一夾，
台車中間黑色齒輪部份就會與台車外殼分離，
然後就可以輕易清洗台車了。
先處理動力台車主體，
黑色齒輪部分拆除後，
車輪便可以輕易隨意轉動；
可以先用棉花棒同洗軌水清潔車輪。
建議多加留意車軸間會唔會有雜毛，
尤其係二手車。
中間金屬部分有時會有舊嘅潤滑油囤積，
可以用棉花棒同洗軌水清除舊嘅潤滑油，
然後再平均地滴少量嘅金屬保護液落金屬部分。 （24-021本身有跟一set滴咀，滴少少就可以。）
然後到黑色齒輪部分，
首先滴幾滴洗軌水落齒輪部分，
然後用牙刷刷洗齒輪，
再用紙巾印乾齒輪。
（其用意爲將舊嘅潤滑油徹底洗掉）
然後再平均地滴少量嘅金屬保護液落齒輪部分。
完成以上清洗過程後，
將台車主體同齒輪部分合上，
再將台車安裝回底盤上。
滴少量嘅金屬保護液於飛輪與摩打之間嘅軸承上（如圖），
再將底蓋安裝回底盤上，
基本上清洗過程大功告成。
保養工序過後，
建議先用慢速至中速行順抽車先，
唔好一下子就開到好快，
不然加油嘅工序就白做了。 （Tomix控約½，Kato控約⅓多少少。）
好好保養列車其實沒難度的說 :P Yousuke1333