列車標貼小談~
其實理論上一架模型買返來，
加完燈，上好晒啲配件，
個感覺就好似大功告成～
真的如此？
我初初玩返N Scale試都係咁諗，
加好咗燈，上完方向幕，仲有啲咩搞？
我試過油埋內籠，油埋凳，
但都硬係爭啲...
大家有冇留意到一架列車上，
其實仲有各式各樣嘢標籤；
例如門同窗上面嘅貼紙，
車身上唔同嘅車種都會有唔同嘅標記，等等。
其實坊間實在有太多各式各樣嘢配件同貼紙，
而我今次則著重介紹一下比較常見嘅款式。
適逢上星期買咗抽Kato嘅南武線E233系8000番台，
就搵呢抽車來做個示範～
首先，不論係加室內燈又好，
貼窗貼同櫈貼又好，
第一步應該就係拆開部車...
呢度有條片分享俾大家，
其實拆開架車就係咁簡單～
**拆開架車嘅時候有啲野要注意，
就係小心會有組件脫落，
例如有啲車嘅方向幕係一塊過嘅膠片來，
又或者一d屬於車頭燈嘅組件，
響拆車時都要多加留意。
拆開咗之後，
大概會分為三大部分，
車殼，車籠同車窗。
車籠方面，如果想增加豐富性，
大家可以嘗試貼座席。
坊間有出Tomix/Kato通勤車嘅坐席貼紙，
但個人就認為單色太單調，唔夠真實。
貴少少其實仲有d印埋絲絨圖案嘅座席，
但價錢當然比淨色的再貴多點...
其實大家可以自行印刷座席嘅貼紙，
下回會同大家介紹同上載一啲比較常見常用嘅座席貼紙圖案，
等大家再多一個幫自己抽車扮靚靚嘅小手作～
車窗方面，最常見嘅貼紙有三類～
分別為車門上嘅注意標貼，優先座／女性車廂標貼同埋廣告標貼。
坊間最常見嘅牌子有三個，分別係:
Ginga Model（銀河模型）
Geomatrix（ジオマトリックス）
http://www.geocities.jp/geomatrix_designers_inc/gdi-index.html
Treasure Town（トレジャータウン）
http://www13.plala.or.jp/t-t_inmt/
頭兩款比較容易搵到，
響Kidsland或各大模型店普遍都會有存貨，
而第三款就無咁易搵，但款式甚廣，
主要可以響Greenmax嘅Crosspoint專門店搵到。
以我抽E233系8000番台為例，
我係揀咗銀河嘅門貼刮貼，同埋TreasureTown嘅優先席裏刮貼。
有樣嘢要提醒大家，
銀河嘅N-581/582同N-583/584分別係門嘅貼紙同優先席嘅貼紙，
兩者嘅分別係N581/583係表貼，N582/N584係裏貼。
表貼就咁貼响窗外，而裏貼就倒返轉貼响窗內～
但我就揀咗刮貼 (N-785),
刮貼方便之處係唔駛鎅餐飽，就咁用牙簽一刮就上完。
同一道理，我揀TreasureTown嘅優先席裏刮貼都係同一原因～
當然，如果計量嘅話，
銀河嘅優先席裏貼會比Treasure Town多嘅。
講起Treasure Town嘅刮貼，
我每次到Greenmax Store都會大搜一番，
其實佢係有分門別類的，
但因為太多啱用嘅刮貼，
所以我會由頭睇到落尾，
當然～～ 如果係Focus响門貼嘅話，
大家可以記住主力搵TTL-80幾同TTL-85幾，
果度你會見到好多啱用嘅門貼。
每包刮貼上都清楚列明一包刮貼可以刮到幾多卡，
有時候一抽十卡嘅車要用到兩至三包刮貼，
大家要記緊注意！
大家可能會問一個問題，
我點知自己架車有啲咩貼係啱用？
或者我應該將貼紙貼邊個位？
呢度有個好好嘅網站可以幫到你～
响『長編成サイドビュー』呢項，
大家可以揀返自己想睇嘅車種，
呢度近乎集齊晒所有車款嘅左右車身正面相，
唔單止係對返啲標貼位置，
就算自己抽車擺亂咗，
大家都可以對返床下幾件去排返啱整列車。
かけやま寫真館
http://kakeyama.image.coocan.jp/index.htm
至於車殼方面，
Kato嘅E233系車身嘅標籤其實都算齊全，
但其實都仲有小小嘢可以玩，
例如乘務員室嘅標記同埋車身緊急車門開關制蓋上嘅箭嘴標記～
乘務員室嘅標記我選用咗くろま屋嘅刮貼，
呢個牌子嘅刮貼如果大家有Tomix嘅車應該好啱用，
因為佢有出好多ATS，定員同所屬標記，
呢啲都係大部份Tomix嘅車所缺乏的...
不過我都唔敢確實講話邊度可以搵到，
因為有時都係好偶爾咁見到幾塊，
呢度有くろま屋嘅網頁～
http://hwbb.gyao.ne.jp/kuromaya-pc/
而緊急車門開關制蓋上嘅箭嘴標記我就揀咗銀河模型嘅刮貼。
加晒燈同刮貼，
合返埋架車，上埋車頂嘅parts，咁就大功告成了。
至於座席，之前曾經畫過一塊較簡單嘅南武線E233系用座席，
下回會再畫一塊更好的，不日供大家下載使用 :)
其實市面上嘅刮貼同貼紙嘅款式真係唔止上述咁少，
同埋好睇你要整嘅係邊款車，
如果閣下想玩嘅係Tomix 103系，
單係買貼紙同刮貼我數都數到好多款，
但如果閣下有咁嘅能耐去玩呢樣嘢，
到完成果刻，你再望番架車，
其實係值嘅～
