外傳－大阪日本橋取經
話說大家周不時都會問起，
“大阪啲模型鋪晌邊架？”
其實大阪梅田同日本橋都有模型店，
我自己就通常徘徊響日本橋範圍，
一來比較就腳同集中，
二来除咗睇火車，仲可以行埋其他地方。
呢篇文會用一個少少似遊記嘅方式，
既介紹一下大阪日本橋有邊幾家模型店，
用第一身（即係我...）去介紹一下每一間店嘅特色，
另外都想推介一下睇火車同時仲有咩好做 :P
首先，文章嘅日本橋即係邊度？
其實即係日本橋駅／近鐵日本橋駅。
如果大家坐大阪嘅地下鐵，
站編號為S17/K17。
留意如果大家要坐阪神難波線／近鐵奈良線，
落咗地底唔好即刻入閘，
要望真啲指示牌，往近鐵方向落多層，
如果一落地底就入閘，就會直入大阪地鐵站。
入錯咗都唔緊要，
閘旁邊有當值職員，
你同佢講Kintetsu（近鐵），
佢就知道你係入錯，會幫你架啦～～～
（因為我入錯過... 汗）
上面有個簡易地圖，
抵達日本橋後，
經十號出口（黑門市場／日本橋交叉點南東）上地面，
沿著堺筋向前行少少就會見到黑門市場嘅入口。
我就建議大街行模型店前可以先逛一下黑門市場，
因為都係同一個方向，
行完黑門市場，醫飽個肚，
再滿足第二個慾望～～～～
又或者如果覺得黑門市場太多人唔想入去，
其實有間黑門拉麵響個入口旁邊，
店舖好細間，基本上得幾個位～
但我幾鍾意果種感覺。
碗拉麵唔錯架都（如圖）～～ :P
（小小離題）
黑門市場有咩行呢個就不用多介紹吧～
基本上来大阪旅遊嘅人稍為睇下旅遊書，
或者有睇過杜如風嘅攻略，
都一定會mark咗呢個景點～～～
雖然話入面都幾多香港人下～
如果要我精挑細揀，
我會揀兩樣野行。
第一係即揀即開嘅海鮮，
有一檔我試過嘅，佢門口有好多生蠔，貝類，海膽等嘅海鮮，
佢標晒每一個大箱入面嘅海鮮幾多錢，
例如我揀咗一隻1200yen嘅生蠔，
夾落個小筲箕度，比錢，
之後老闆就會即場開比你食～～～
我自己平時好少食生蠔，
但果隻1200yen嘅生蠔唔係講笑， 齋落少少檸檬汁擺落口，肥到不得了 XD
第二就係生果店，
日本嘅蜜瓜真係唔惹小，又甜又多汁～！
我上次買咗個熊本肥後瓜 (3980yen@)，
超讚的 XD 當然，佢有啲切好咗嘅瓜賣 (500yen一串)，
但我就唔sure切咗之後嘅瓜啲汁仲有無咁多喇 XD
我就揀咗串菠蘿 (200yen)，都正～！
行完黑門市場之後，
沿著堺筋同一個方向繼續行，
經過高島屋東別館，
見到有棟建築物有幅高達響外牆 (Super Kidslandキャラクター館)，
鐵道之旅由此展開了～
堺筋周邊有五間鐵道模型店，
如果計埋龜屋就六間（龜屋mainly for玩車）。
Super Radio Control（スーパーラジコン）就遠少少，
我建議先行堺筋果五間，
唔夠喉又有興趣嘅，先再行去スーパーラジコン。
各店嘅位置大家可以參考下呢度：
1. ポポンデッタ大阪日本橋店
首先，大家會先踏足ポポンデッタ大阪日本橋店，
店嘅位置就響麥當勞旁邊，
扶手電梯入口會見到好多鐵道模型嘅海報，
同埋有一個小Layout～～
經扶手電梯上兩層就會直達店舖。
Um… 如果大家有去過秋葉原嘅ポポンデッタ，
大概會估到點解我會慨嘆一下～
呢間... 其實同秋葉原嘅都幾大分別下...
店內有新車，亦有中古車，
一直行入去會見到好多書架，
入面有好多中古鐵道雜誌～
呢樣嘢我諗應該係唯一超越秋葉原店囉 XD
另外佢有個layout可供玩者，
Layout有分上下層，各線收費不同，
閒日就350-400yen，假日就600-900yen不等～
留意，ポポンデッタ只收現金同埋無免稅。 溫馨提示～ ポポンデッタ嘅出口係後街来，轉右再轉右就可以出返去堺筋 :P
2. スーパーキッズランド本店 (Super Kids Land)
スーパーキッズランド本店 (Super Kids Land)可以話包羅萬有，
成棟建築物入面唔單止有鐵道模型，
仲有玩具，四驅車，飛機，軍事等等，
基本上每一次來到都會直上頂樓 XD
上到頂樓第一眼應該會見到一大堆特價品響眼前～
不妨細心望望，有時真係平得幾誇張下～！
成層樓基本上就好似一個超級市場咁，
所有野都分門別類整齊咁排列好，
新出嘅模型，B Train，Tomytec，建築物，零件等等都好容易搵得到。
呢度仲有唔少Parts，尤其係Tomix嘅Parts，
櫃桶旁有一本Tomix Parts嘅Catalog掛咗響度，
大家唔記得嘅話可以掀下本Cataog對返個Item No.～
除此之外，仲有列車系列嘅Blu Ray/DVD同埋唔少列車嘅精品，
我個人覺得Kids Land係日本橋其中一間必行嘅取經地 :)
Kids Land有退稅，另外用Visa結帳有5% Discount。
3. ホビーランドぽち日本橋1号店
ホビーランドぽち日本橋店，俗稱『狗舖』~
其實係一家中古模型店来～
我諗大家可以用尋寶嘅心態去摸索呢間店舖，
除咗盒裝嘅車之外，
佢仲有一籃籃嘅中古車卡，
大家不妨『巢吓』睇下有無屬於你嘅寶藏 XD
我真係見過有人『巢』咗一抽車出來lol！
4. 大阪ショールーム (Volks Toys)
Volks Toys同Kidsland其實好似，
不同層數展示不同嘅玩物～
鐵道模型響6樓，
大門口嘅右手邊有電梯可以直達各層。
Volks嘅陳列方式我覺得比Kidsland舒服，
環境無Kidsland甘嘈吵，
就算唔買嘢我覺得都直得一逛。
模型，貼紙同零件存貨都唔少，
排列得非常整齊～
（我會主力搵銀河模型嘅刮貼）
另外，行入少少會見到有格仔，
果度其實好似格仔鋪咁，
入面會有人放啲鐵路嘅物件寄賣～
唔一定係車，有時會有小情景，DIY嘅野，等等...
有時細心望下有機會搵到好嘢 :P
我見過有砌好咗嘅GM 103系N40 4卡連摩打賣4800yen，
不過自己懶得搵車番嘅刮貼，放棄咗...～
Volks買夠5000yen有退稅，可以用信用卡。
5. グリーンマックス・ザ・ストアー 大阪日本橋店
響我未去過秋葉原嘅GM Store之前，
我曾經視呢間店舖為隱世聖地；
因為呢度有好多好啱駛嘅貼紙賣，
尤其係TreasureLand嘅字貼同門貼～
但去完秋葉原嘅GM Store之後，
就覺得呢間GM Store好似養老院咁 XD
Anyway，呢間GM Store都有佢可取之處嘅～
入到店舖嘅右手邊你會見到一棚抽屜，
入面有好多附加零件同貼紙。
基本上入面啲貼紙係順號碼牌的，
響抽屜頂有一張list有晒啲貼紙嘅編號～
但張list啲字印到密密麻麻，
所以我每次都會全部掃一次，
當然... 巢過幾次就會知道自己想要嘅刮貼大概響咩位 :P
除此之外，
近收銀櫃位位置嘅櫃旁會有一啲特別嘅私鐵刮貼，
例如近鐵50000系嘅車頭藍絲帶賞，
南海50000系嘅機械人貼紙，等等～
GM Store消費無退稅，買刮貼都幾重皮下... -_-”
6. グリーンマックス・ザ・ストアー 大阪日本橋店
Super Radio Control (Super RC)位置比較遠，
由堺筋行過去大概需時10－15分鐘。
Um…… 起初覺得都會有啲收穫，
但隔咗一排再去，發覺啲貼紙都冇乜加減，
反而我覺得佢Tomytec嘅產品好豐富下～～～
尤其係情景方面。
除咗鐵路，佢仲有好多模型用嘅工具～
如果大家時間許可嘅話，
可以行埋Super RC嘅～
不過如果本身唔預太多時間響模型店，
咁我就建議主力行堺筋果四間～
如果係想買門貼嘅話，
就可以花少少時間響GM Store。
P.S. Super RC有得退稅，如果用現金付費有5% Discount。
7. 鉄道模型の店・亀屋
最後想介紹一下龜屋～
龜屋嘅Layout個人覺得都算有心機，
佢同時有N Scale同HO Scale嘅Layout，
N Scale個Layout有幾個好正嘅大彎位，
影相拍片一流～！
如果大家買完車想搵個地方即場玩下，
可以考慮呢度～
N/HO Scale放車同價，一小時500yen。
另外，近收銀處附近有少少中古品，
唔算好吸引，不過上到去就不妨望下... :P
其實如果論豐富，
我覺得秋葉原的確豐富得多，
但如果話來到大阪想取經，
日本橋都算係一個唔錯嘅地方～
至少我每一次來都大出血... XD
本編完