南武線 205系 上集
今回想介紹一下我點樣幫自己嘅Kato 205系扮靚～
文中大家會見到三款唔同嘅南武線205系；
分別係10-490，10-493同10-1341。
本身南武線隻色我挺喜歡的，
但原裝嘅Kato 205系我覺得太單調，
所以每列205系我都花過少少心思 :)
Kato嘅205系本身車身上已有不少印刷，
隨車亦會附上一塊方向幕貼紙。
貼紙上除咗方向幕外，
仲有車廂號碼牌同車窗上嘅優先席標貼。
但我自己就略嫌就咁貼上去唔夠靚仔，
所以我另外準備咗少少刮貼～
關於門貼方面，
大家廣為認知嘅門貼應該都係四四方方果塊，
但其實關東車再細分起上來仲有唔少款式；
用嚮南武線同横浜線嘅205/209系上嘅門貼又係另一款來，
響原先個四四方方嘅門貼下面仲有一個圓圈～
建議大家買門貼之前記得做定資料搜集。
Kato嘅205系畢竟係舊模来，
縱使翻出過好多次，
始終都係無跟連結幌...
加上原車係用Kato早期嘅台車電連勾，
卡與卡之間嘅罅隙都唔細的...
呢度推介大家一款F&Mokei嘅連結幌。
佢寫住Kato 205系同103系專用，
我自己就試過用落Greenmax嘅103系，一樣咁Fit!
一包有8個連結幌，
如果係南武線205系6卡車嘅話就要用10個（兩包），
連結幌需要另外用模型膠水黏貼在車身上，
如果唔想傷車，白膠漿亦勉強可以。
室內燈方面，
我用咗Kato嘅11-212（白色LED），
頂部我先貼咗一層錫紙膠紙，
之後用咗一塊黃色嘅玻璃紙墊住塊集光板；
咁樣會做到果種黃黃地嘅光管效果。
另外，想增強車頭方向幕嘅光度嘅，
可以用錫紙去引導啲室內燈嘅燈光去車頭方向幕嘅膠粒，
咁樣就可以更突出車頭方向幕嘅光度 :)
至於車身嘅廣告貼，
我係上網搜集資料過後再自己整印水貼，
逐塊貼上列車上的～
的確係幾費時的，
但得出來嘅效果係幾特別的 :)
現實列車如下（圖片來自Google)：
其實205系可以玩嘅唔知咁少～
座席呢？
同埋坊間曾經出過一啲更真實嘅車頭擋風玻璃組件，
呢啲會嚮下集介紹埋。
（因為組件需要自行上色，我未買模型油...）
剩餘的留待下集分解 :)
本集完