東京メトロ10000系
首先響度感謝大家嘅支持 :P
小編旨在介紹同分享一下自己玩車嘅小主義，
透過一啲簡單嘅方法令自己嘅列車更加漂亮，
又或者更有個人特色～
本篇為部落格第30篇文章
想同大家分享嘅係Kato嘅東京地下鐵10000系～
是次嘅手作一如以往，
三個步驟：燈，櫈，貼。
首先第一步介紹嘅就係加室內燈～
呢抽車嘅車籠較為新款，
有預設用來固定集光片同LED燈嘅『凸位』，
理論上漏光嘅機會比舊款嘅內籠低微；
但為求零漏光，我仍選擇用錫紙貼紙封住集光片同LED燈。
另外，為凸顯座席嘅效果，
響車頂亦都貼上一塊錫紙貼紙（如圖）。
圖中黃色箭嘴嘅凸位係對應番集光片嘅兩條坑位，
集光片記得較闊果一面向下，較窄一面向上。
整完燈之後就輪到座席。
10000系實車嘅內裝係黃色櫈夾黃色地板，
第一次做呢架車嘅座席唔太成功，
因為本身Kato嘅原裝內裝係米色，
執左幾次之後效果頗為突出～
Zoom近啲看看 :P
燈，櫈都搞掂晒，
之後就輪到『貼』了。
其實Roundhouse曾經出過10000系專用嘅貼紙，
上面有齊8Cars標記，優先席貼，女性專用車貼，方向幕等等～
不過我就無用到呢塊貼紙；
我所用嘅刮貼如下：
1. Geomatrix『乘務員室』刮貼
2. Treasure Land #TTL856-05 ドア注意・優先席表示(地下鉄)
乘務員室刮貼主要係用響駕駛室隻細窗上，
頭尾兩卡左右共4個。
其實呢塊刮貼有唔少車都啱用，
例如舊國鐵103系，私鐵等等，
同一塊刮貼有打直同打橫，
自己因應返實車去使用～
另一廂，Treasure Land嘅#TTL856-05有唔少標籤都啱架車用的，
例如優先席標記，門上嘅標記，則窗上嘅貼紙等等；
而弱冷房車標記模型本身預印咗，大家當係後備吧。
但留意，一塊刮貼只足夠刮6卡車，
如果要刮晒10卡嘅話就要買兩包。
至於窗上嘅女性專用車廂貼紙，
我係自己響電腦執完圖，
印落印水貼再貼上車窗上。
效果未必能十足比美大廠嘅絲印，
但效果出來也不俗，
同埋重點係免費... XD
始終一抽車先得6塊女性專用車廂貼，
同埋未必每一條線或每一款車都有出女性專用車廂貼紙...
最後，之前曾經有篇文章介紹過什麼叫『加喉』～
其實係講緊Kato嘅Z04-5589；
將組件安裝響車勾上，
用以模仿真車車與車之間嘅連接喉。
詳細可以點擊以下連結：
本身抽車已經做得好靚仔，
加多少少簡易嘅手作仔更能令整列列車增添生氣～
希望小編嘅小小分享能勾起大家整車嘅樂趣 :P
本編完（感謝友人借出列車模型 :P）
#零件 #座席 #刮貼 #貼紙 #Decal #Kato #室內燈 #NScale #Lightings #Nゲージ #InstantLabel #ModelTrain
