軌道保養 （Tomix 軌道保線車）
上回講到有好多唔同因素影響列車行駛嘅表現，
介紹完如何清潔及保養台車後，
今回輪到介紹路軌嘅保養。
我自己屋企電視櫃上放咗個橢圓形嘅小圈，
每天在家時都會開著列車，
行咗差唔多一星期左右，
其實就咁用手指掃一掃條路軌面，
已經掃到兩行污跡來...
我自己就選擇用一個較方便快捷嘅清洗方法～
就係呢個主題嘅主角 - Tomix軌道保線車了。
用保線車可以輕易咁清潔一啲難以觸及嘅位置，
尤其係如果閣下有玩情景，
呢部車就顯得更加方便～
***首先要提一提先
呢部軌道保線車係Trailer Car來，
不能獨自行走，需要有一台機關車牽引行走。
同埋最好唔好用太細嘅機關車，
例如DD13/DD16等迷你機車，
有機會唔夠力拉架軌道保線車的...!
呢部車同時結集咗三個功能，
分別係吸塵，濕洗及乾磨。
通常我會先吸塵，再落洗軌水濕洗。
乾磨我好少用，都唔建議大家隨便用，
因為本身路軌面層有保護塗層，
乾磨的確會磨到路軌擸擸炩，
但亦都會磨走保護塗層，
咁路軌就會無咁襟用架喇...
軌道保線車盒底有說明書，
其實已經清楚介紹每一種洗法需要換上甚麼配件，
我呢度就有個懶人包，
好簡單咁Show俾大家睇～
而在軌道保線車嘅頂部有個switch，
分別有Off, On同CL-Power。
Off同On就照字眼譯唔難理解，
而CL-Power其實係同常點燈嘅原理差唔多，
只係比少少電（約3V），令機關車以慢速行走，
但軌道保線車嘅摩打卻已經能夠高速運作；
呢個功能最主要係針對乾磨，
因為如果列車以高速行走嘅情況下磨路軌，
會增加翻車嘅風險。
至於濕洗，說明書建議要睇layout嘅大小，
如果需要清洗嘅路段範圍係比較大同遠程，
係可以選擇以較高／快嘅速度去進行呢個動作。
其實都容易理解的～
因為洗軌水會慢慢由頂部滲落路軌，
如果開得太慢，未洗到相關路段時可能都已經用光了...
反之如果範圍比較細，用一個適當嘅車速變可。
之前提到軌道保線車可以吸塵，
但吸咗嘅塵會去邊度？
其實車身有個可以拆出來嘅網，
果個網就係隔塵網來，
大家耐唔耐都要記得搵支棉花棒掃下啲塵～
同埋台車同車底個掃都會積塵，
要多加留意。
另外，濕洗果塊白色嘅布貼洗多幾次之後就會變黑，
如果太黑嘅話，係需要更換的～
換嘅方法好簡單，
只要撕掉舊嘅布貼，換塊新嘅上去，
咁就ok了～
如果用光了，大家可以買Tomix嘅＃6424，
那就是布貼跟磨沙貼了。
以下係一個小示範，
我用一台Tomix嘅ED62牽引着軌道保線車進行濕洗～
我校咗CL-Power，所以即使開得唔算太快，
下面嘅轉動摩打都可以輕易進行濕洗動作。
只要定期好好保養列車嘅台車同路軌，
基本上列車就能非常穩定地在軌道上『漫步』了～
有任何問題隨時可以留言喔！